በገዢው በሊበራል ዶሞክራቲክ ፓርቲና በተቃዋሚዎች መካከል ከፍተኛ ክርክር አስነስቶ ጠቅላይ ሚኒስትሩ በተደጋጋሚ ስለ ጉዳዩ ማብራሪያ እንዲሰጥ የተጠየቀው በዚህ ጉዳይ ላይ ነበር። ጠቅላይ ሚኒስትሩ ዕርዳታው ISIS ለመዋጋት ሳይሆን የሰጠነው የመካከለኛው ምስራቅ መረጋጋት አስፈላጊ ነውና ISIS ለማስቆም ለሚሰሩ ሀገሮች ወታደራዊ ያልሆነ ድጋፍ ነው ያደረግነው የሚል ምላሽ ሰጠ። ተቃዋሚዎችና የተለያዩ ሰዎችም በዚህ ወቅት ግብጽ ድረስ ሄዶ ጠቅላይ ሚኒትሩ በይፋ የገንዘብ ዕርዳታ እንደሚያደርግ መናገሩ ነው ለጥቃት ያጋለጠን። መርዳትም ከነበረብን ከዚህ በፊት እናደርግ በነበረው መልኩ ማድረግ እየተቻለ ጠ/ር አቤ ነገሩን ለማስቆም ከሚቻልበት ጉዳይ ጋር አያይዞ ማቅረቡ ተገቢ አልነበረም የሚል ትችንና ተቃውሞ ቀርቦበት ነበር። ጠቅላይ ሚኒስትሩም ሆነ ፓርቲው በተለመደው መልኩ በሥርዓትና በጨዋ ደንብ ነበር ለተነሳው ተቃውሞ ሁሉ ምላሽ ሲሰጡ የነበረው።

በመጨረሻም የተነሳው ክርክር ሁለቱን ዜጎች ለማትረፍ ምን ይደረግ? የሚል ነበር። መንግስት ISIS በጠይቀው መሰረት ገንዘቡን እንደማይሰጥ በግልጽ አስቀምጦ በሌላ መንገድ ዜጎቹን ለማዳን ነው ድርድር የጀመረው። ገዢው ፓርቲ ከታቃዋሚዎች ከፍተኛ ትችት ቢቀርብበትም ስሜታዊ ሆኖ የሰጠው ምላሽ አልነበረም። በሕዝቡ በኩል ግማሹ የተጠየቀው ገንዘብ ይከፈልና ነጻ ይደረጉ ሲሉ ሌሎቹ ደግሞ መከፍል የለበትም የባሰ አደጋ በራሳችን ላይ እናመጣለን የሚል ሀሳብ ያንጸባርቁ ነበር። በመጨረሻም የተባለው ገንዘብ አልተከፈለም ያው ከዚያ በኋላ ISIS ያደረገውን አይተናል።

እነሱ የሚሰደድ ዜጋ የላቸውም። ለሽብርተኛ ጥቃት የሚጋለጡት ለስራ ወይም ለጉብኝት ሲንቀሳቀሱ ነው። ያም ቢሆን ግን በዚህ ደረጃ ሁለት ዜጎቻቸው ሲገደሉባቸው የችግሩ ምንጭ ምንድነው? ብለው መፍትሄ ለመስጠት ገዢው ፓርቲ ሀላፊነቱን ወስዶ ተንቀሳቀሰ እንጂ ተቃዋሚዎችን ሲኮንን ውሎ አላደረም። በውጪ ጉዳይ ፖሊሲያቸውም በኩል ክፍተት ካለ ለመፈተሽ ቃል ገባ እንጂ ፍጹም ነኝ ብሎ አልተመጻደቀም። ሚዲያዎቻቸው በጉዳዩ ላይ ሁሉም ሰው የሚሰማውን በግልጽ እየተናገረ ውይይት አካሄዱ እንጂ የተፈጠረውን አጋጣሚ ለገዢው ፓርቲ የፕሮፓጋንዳ መዋያ እንዲሆን አላደረጉም። ጠቅላይ ሚኒስትሩ ለቀረቡለት ጥያቄዎችና ትችቶች በሙሉ በተገቢው መልኩ ምላሽ ሲሰጥ ነበር።

እንደ ሀገር ጃፓን የደረሰችበት ደረጃ አልደረስንም። ማነጻጸርም አይቻልም። ኢህአዴግም እንደ ጃፓን ገዢ ፓርቲ ዲሞክራት እንዲሆን አልጠብቀውም። ባሕሪውና የመጣበት መንገድ እንደዚህ አይነት አመለካከትንና አሰራርን እንዲያዳብር አላደረገውም። ነገር ግን ከሕዝብም ሆነ ከተቃዋሚዎች የሚቀርበውን ቅሬታ ሰምቶ ተገቢውን ምላሽ መሰጠት አለመፈለጉና አለመቻሉ ሳያንስ አልፎ ሄዶ እጅግ በዘቀጠ ሁኔታ የዜጎችን ሞት ለራሱ ፖለቲካዊ ትርፍ ለማዋል መንቀሳቀሱ፣ ሰማያዊ ፓርቲን የISIS ወኪል ነው ማለቱ የሚያሳፍር ነው። የሕዝቡን ንዴትና ቁጭት ተረድቶ እንደ ዜጋ የሁሉንም ስሜት ተጋርቶ በፍጥነት አለመንቀሳቀሱ ብሎም የችግሩን ትክክለኛ ምንጭ ትቶ በሌሎች ወገኖች ላይ ፕሮፓጋንዳ ለመስራት መሞከሩ ኢህአዴግ ምን ያህል ከዜጎችና ከሀገር ክብር በላይ ለሥልጣኑ የሚሳሳ ፓርቲ መሆኑን ድጋሚ ያረጋገጠበት ነው።