ሰለሞን ታደሰ
ይህች እህል እና ውሃ ያልለየች የ4አመት ከ6 ወር ታዳጊ መኖሪያዋ እዚሁ አዲስ አበባ ውስጥ ነው ።
በአንድ የቀን ጎዶሎ ወላጆቹዋ በተከራዩበት ግቢ ውስጥ ነዋሪ በሆነ የ25 አመት ወጣት እንደተደፈረች ለፖሊስ በደረሰ ክስ መነሻነት እና በተደረገላት የህክምና ምርመራ ድንግልናዋ ያልተገሰሰ ቢሆንም የማህፀን ግድግዳ የመሰንጠቅ ፣ የመላላጥ እንዲሁም የመቅላት ምልክት እንደሚያሳይ ይጠቁማል።
ተከሳሹ በጊዜው በ30,000 (ሰላሳ ሺህ ብር) ዋስትና ከእስር የተፈታ ሲሆን የተመሰረተበት ክስ ደግሞ በመራቢያ አካሉ ሳይሆን በእጁ ነው ድርጊቱን የፈፀመው በሚል በአስገድዶ መድፈር ሳይሆን “6264 ሀ ን በመተላለፍ” ማለትም “መሰል ድርጊት ” በተባለ ሆነ።
ጉዳዩን ሲከታተል የቆየው የፌደራሉ ከፍተኛ ፍ/ቤት አቃቂ ቃሊቲ ምድብ ችሎት ተከሳሹን ጥፋተኛ ነህ በማለት ሀሙስ እለት የወሰነው ውሳኔ ግን በርካቶችን ያስደነገጠ እና የወላጆችዋን አንገት ያስደፋ ነበር… የ4 ወር እስር!!!!።
እለተ አርብ መረጃው እንደደረሰኝ ከአሚራ እናት እና አባት ጋር ወደ ፍርድቤቱ በመሄድ ዳኛውን ለማግኘት እና ለማነጋገር ብሞክርም ባለመኖራቸው ሊሳካልኝ አልቻለም ። በመቀጠል ወደ አቃቂ ቃሊቲ ፍትህ ፅ/ቤት በማምራት ከቢሮው ዋና ሀላፊ ጋር በመሆን የውሳኔ ፋይሉን መመልከት ብንችልም ውሳኔው እንደተገለፀው ነበር ።አቃቤ ህጓ የክስ ደረጃውን ለምን ዝቅ አደረገችው? መድፈር ማለት ምን ማለት ነው? ጥፋተኛው ተጠያቂ እንዲሆን የግድ ድንግልናዋ መገሰስ ነበረበት? የሳንባ በሽተኛ እና በቀጣዩ አመት ተመራቂ ነኝ ብሎ የጥፋት ማቅለያ ማቀረብስ ከእርከን በታች ፍትህ ያሰጣል? ለእነዚህ ሁሉ ጥያቄዎቼ የሀላፊው መልስ ” ስለጉዳዩ የሰማሁትም ከአንተ ነው አቃቤ ህጓን አነጋግሬ ሰኞ መልስ እሰጥሀለሁ”የሚል ነበር።
እነዛ በችርቻሮ ንግድ የሚተዳደሩት ምስኪን ወላጆች ግን በተሰበረ ልብ እንባቸውን እየዘሩ ” ወላድ ይፍረደን!! መንግስት ይፍረደን!!” ይላሉ በህይወቴ ለመጀመሪያ ጊዜ ጋዜጠኛ መሆኔን ጠላሁ ህመማቸው አመመኝ! እንባቸው አስነባኝ።
እኔ አቅመ ደካማው ፍትህን እንዳሰጣቸው ሲለምኑኝ ከማፅናናት ውጪ የምለው ባጣ ሀገር ይስማው… ለፍትህ እንጩህ አልኩ።
ፍትህ ለአሚራ!!!!!!
( ፎቶው የአሚራ የጀርባ ምስል ነው)