ነገ የአማራ ክልላዊ መንግስት ዋና ከተማ በሆነችው ባህርዳር ላይ ታላቅ ሰላማዊ ሰልፍ ይደረጋል። ዛሬ ለዋዜማ ድምቀት በከተማዋ ካለው መነሃሪያ በመውጣት አውቶቡሶችና ሚኒ ባሶች ጥሩምባ እየነፉ ከተማዋን ሞቅ ደመቅ እንዳደረጉ ተሰምቷል። መልእክቱ ግልፅ ነው፥ነገ ይቀወጣል።

የጎንደር ህዝብ ምስጋና ይግባውና የፖለቲካ ድባባችንን ፈወሰው። የጎንደር ህዝብ “በኦሮሚያ የሚፈሰው ደም የኛ ደም ነው” ሲል በደስታ ሲቃ እንዳወራረድነው ቢያንስ አንድዬ ምስክር ነው። በእርግጥ በዚህ የተከፉ እንደሚኖሩ ለመጠርጠ ጠንቋይ መቀለብ አይኖርብንም። የጎንደር ህዝብ ድርጊት እኛን የደስታ እምባ ከማስነባት ያለፈ ፋይዳ ያለው ነው። ዛሬ በአፀፋው የአዳማ ህዝብ “አማራ የኛ ነው” ነው ሲል እንድንሰማ አድርጓል።

ሰሞኑን በተለያዩ ቦታዎች ያሉ የኦሮሞ አክቲቪስቶች ዛሬ በተደረጉ ሰልፎች ላይ እንዴት የአማራውን ህዝብ ብሶት እንደራሳቸው ብሶት ለማስተናገድ በሚገርም መጠን ደፋ ቀና ሲሉ አይተናል። ሰሞኑን ኢሳት የኦሮሞ ሚዲያ ኔትዎርክ የአማርኛ ፕሮግራም ኦሮሞ ሚዲያ ኔትዎርክ ደግሞ የኢሳት የኦሮሚኛ ክፍል መስሎ እንዲሰነብት እንዳደረገ ኖረን አይተናል። ይህን ተአምር ሳያይ ለሞተው ለመለስ ዜናዊ ዛሬ አዘንኩለት።

አቦይ እንኳን የሸራተን አዲስ ሉዊ 16ኛ ያልገደለዎ። በረከት እንኳን ይህን ጉድ ኖረህ አየህ። አባይ እንኳንም ያልሞትክ። አዜብ ሃዘኑ አንቺ ላይ ሊበረታ እንደሚችል ባስብም አላዘንኩልሽም። እንዲህ አይነቱን ነገር ኖሮ ማየት ብቻውን ትልቅ ህመም ሆኖ ሳለ በጣም የምትወጂው ባልሽ የእድሜ ልኩ ድካም እንዲሁ መና ሲቀር ከማየት በላይ የሚያቃጥል ነገር ከወዴት ይገኛል? አይዞሽ አቃጥሎ አቃጥሎ ይገልሻል፤ያኔ እስከወዲያኛው ትገላገይዋለሽ።

አሁን የተፈጠረውን የህዝብ መነሳሳት ከፍ ወዳለ ደረጃ እናሳድገው በሚለው ጉዳይ ላይ መነጋገር ይኖርብናል። እስካሁን የተደረጉት ሰልፎች ከሁለቱ ክልሎች በላይ አድማሳቸው ሊሰፋ ይገባል። እስካሁን የተደረጉት ሰልፎች ሰልፈኞቹ ጥያቄያቸውን አቅርበው ወደቤት የሚመለሱ ናቸው። ከዚህ በሗላ የሚደረጉ ሰልፎች ግን ሰልፈኞቹ ጥያቄያቸው ሳይመለስ ወደየቤታቸው የማይመለሱበት እንዲሆን ምን ማድረግ ይኖርብናል? በጎንደር አካባቢ ያየነውን አይነት “ከተኮስክብኝ እተኩስብሃለሁ” የሚለውን ህዝብን አንገቱን ቀና የሚያደርጉ እንቅስቃሴዎች እንዴት በሁሉም ቦታዎች እንዲቀጣጠሉ ማድረግ ይኖርብናል? የሚሉና ሌሎች ጥያቄዎች ላይ የፖለቲካ ሃይሎች መነጋገርና አቅጣጫ መስጠት ይኖርባቸዋል። ከወያኔ በሗላ ሀገራችን የሚኖራት መንግስት ምን መምሰል ይኖርበታል በሚል ሃሳብ ላይ የሰከነ ውይይት ሊደረግ ይገባል። በተለይ ኢሳትና ኦኤምኤን በዚህ ዙሪያ ሰፊ ውይይት መክፈት ያለባቸው ይመስለኛል።

ከላይ ከተነሳው ሃሳብ ጎን ለጎን በአፋጣኝ በውጭ ባሉ የኢትዮጵያ ልጆች መሰራት ያለበት ጉዳይ ያለ ይመስለኛል። በሃገር ውስጥ ላለው እንቅስቃሴ በውጭ የምንገኝ የዚያች መከረኛ ሃገር ልጆች እኛም አጋርነታችንን ማሳየት ይኖርብናል። በተለያዩ ቦታዎች በህዝባችን ላይ የሚደረገውን ግፍና መከራ በምንኖርባቸው ሀገሮች ልናስረዳ ይገባል። በተለያዩ ሀገራት የሚደረጉ የአጋርነት ሰልፎች የጎንደርንና የአዳማን መንፈስ የያዙ መሆን ይኖርባቸዋል። መከራ አንድ እንዳደረገን፥እነርሱ አንዳቸው ለሌላቸው እንደሚያስቡ ሁሉ እኛም እንደምንተሳሰብ እናሳያቸው።ሰልፎቹ በሁሉም የማህበረሰብ አባላት እንዲጠሩ እናድርግ።በአንድ ከተማ የሚኖሩ የኦሮሞ ኮሚዩኒቲ አባላት ከሌሎች የኢትዮጵያ ኮሚኒቲዎች ጋር አብረው ሰልፍ ማዘጋጀት ይኖርባቸዋል። በተለይ የትግራይ ኮሚዩኒቲ አባላትን ለማሳተፍ መጣር ይኖርብናል። እኛም ትግሬዎች እንደሆን ልናሳይ እነርሱም በእርግጥ ሞታችን ሞታቸው እንደሆነ ሊያሳዩ ይገባል። ኢትዮጵያ የሁላችን፥ሁላችንም የኢትዮጵያ ነን።

ኢትዮጵያን እግዚአብሄር ይባርክ! ብል የሚቀየመኝ ማን ነው?