Print
Email
0
0
በጠቅላይ ዓቃቤ ሕግ ሥር የሕግና የፍትሕ ጉዳዮች አማካሪ ጉባዔ፣ የሚዲያ ሕግ የጥናት ቡድን የሚዲያ ሕጎች ችግሮችን በመለየት ሪቂቅ ሪፖርት አዘጋጀ፡፡
በ15 አባላት የተዋቀረው ቡድን፣ ዋነኞቹ የሚዲያ ሐጎች በይዘታቸውም ሆነ በአተገባበራቸው በዘርፉ ተዋንያን ላይ ከፍተኛ ጫና መፍጠራቸውንና ዘርፉም እንዲዳከም አስተዋጽኦ ያደረጉ መሆኑን መረጋገጡን የገለጸ ሲሆን፣ ‹‹በአገራችን ሐሳብን የመግለጽ መብት ላይ በሕግ የተጣሉ ገደቦችን ስናይ፣ ገደቦቹ ኢትዮጵያ ካፀደቀቻቸው ስምምነቶች፣ ከሕገ መንግሥቱ ድንጋጌዎችና ከሌሎች አገሮች ልምድና ተሞክሮ አንፃር ሲታይ መብቱን ከማክበር፣ ከመተግበርና ከማስቻል ይልቅ ቁጥጥር ላይ ያተኮሩና አሉታዊ ውጤት እንደነበራቸው ማየት ተችሏል፤›› ሲልም ይገመግማል፡፡
በዚህም መሠረት፣ ‹‹የሚዲያ ተቋማት ገለልተኛ፣ ተፅዕኖ ፈጣሪና ሞጋች መሆን አልቻሉም፤›› ብሏል፡፡
በዋናነት የመገናኛ ብዙኃንና የመረጃ ደኅንነት አዋጅ የብሮድካስቲንግ አገልግሎት አዋጅና የኮምፒዩተር ወንጀል አዋጆችን የገመገመው ቡድኑ፣ በተጓዳኝ የወንጀል ሕጉን፣ የፀረ ሽብርተኝነትና የማስታወቂያ አዋጆችን የተመለከተ ጥናት ማድረጉን ያሠራጨው ረቂቅ ሰነድ ያስረዳል፡፡
ለሕጎቹ መመዘኛነት ዓለም አቀፋዊና አኅጉራዊ የሰብዓዊ መብቶች ድንጋጌዎችና የኢትዮጵያ ሕገ መንግሥታትን የተጠቀመ ሲሆን፣ ሕጎቹን አንቀጽ ገምግሟል፡፡
የመገናኛ ብዙኃን የመረጃ ነፃነት አዋጅን በተመለከተ በአንቀጽ 5 የሚዲያ ሥራዎች ለአገር ውስጥ ባለሀብቶች ብቻ የተገደቡ መሆናቸው፣ እንደ አስፈላጊ ክልከላ ሊቆጠር የሚችል እንደሆነና የትውልደ ኢትዮጵያዊያንን ሚና የገደለ እንደሆነ ተጠቅሷል፡፡
በተመሳሳይ ተደራራቢ የሚዲያ ባለቤትነትን የሚነደግገው አንቀጽ 7 ዘርፉን ማዳከሙ፣ አንድ ግለሰብ ብቻውን የመገናኛ ብዙኃን ሊያቋቋም የሚችልበት አሠራር በመቅረቱ ፕሬስን ለማስፋፋት እንቅፋት መሆኑና በተመሳሳይ ስያሜ የሚታተሙ መጽሔትና ጋዜጣ ባለቤት መሆን አለመቻሉ በዘርፉ ዕድገት ላይ እንቅፋት መፍጠሩን በረቂቅ ሪፖርቱ ተገልጿል፡፡
የመረጃ ነፃነትን የተመለከቱ ድንጋጌዎች፣ ምዝገባና ፈቃድን የተመለከቱ ድንጋጌዎችና የተቆጣጣሪ ተቋማት ገለልተኛነትን በተመለከተ ሊስተካከሉ የሚገባቸውን ችግሮች ተነቅሰው ቀርበዋል፡፡
ለአዋጁ የማስፈጸሚያ ደንቦችና መመርያዎች አለመኖር፣ የሕዝብ ግንኙነት ባለሙያዎች አመዳደብና አድሏዊ አሠራር መኖርና መረጃ የመስጠት መብትን ለማረጋገጥ አስገዳጅ ሥርዓት አለመኖር፣ የመገናኛ ብዙኃን የመረጃ ነፃነት አዋጅ ለማስፈጸም አዳጋች ማድረጋቸውን ሰነዱ ያስረዳል፡፡
የብሮድካስቲንግ አገልግሎት አዋጅን በሚመለከት የብሮድካስቲንግ ባለሥልጣን ገለልተኛ አለመሆን፣ የአገልግሎት ፈቃድ ለይዘት ክትትልና ቁጥጥር የሚጋብዝ መሆኑን፣ በዝርዝር ያልተተረጎሙ የክልከላ ድንጋጌዎች ላልተገባ ቁጥጥርና ጫና ለማድረግ የተጋለጡ መሆናቸው ተመልክቷል፡፡
ይኼንን ግምገማ ተከትሎ አዋጆቹን የማስተካከልና የማሻሻል ሥራ ከሰፋፊ ውይይቶች በኋላ ይከተላል ተብሏል፡፡ ቅዳሜ መጋቢት 7 ቀን 2011 ዓ.ም. በረቂቅ ሪፖርቱ ላይ በኢሊሌ ሆቴል የመገናኛ ብዙኃን ባለሙያዎች ውይይት አድርገዋል፡፡
Average Rating